Last minute: "Ez gaituzue makurraraziko" Itzuliko ez den egoeraren minez Bake iraunkorraren gako bila Estatus politiko berriari "behingoz" heltzeko eskatu dio EAJk Rajoyri Barcinak irailerako adostu nahi du hitzarmen aldaketa Madrilen ESANA. CARMEN ALBA. PPNko gestorako kidea Poliziak Xabier Gonzalez atxilotu du Erroman Jaurlaritzak txalotu egin du Masen "malgutasuna" Independentzia Eguna eginen dute hilaren 9an, Leitzan Aldarri ozena tontorretik
feeds
Listen live!

Latest

April 5, 2013

“Esanguratsua da alfabetatzean eta hedabideetan baliabideei eustea”

img/P1230188.JPG

Jaurlaritzaren aurrekontu proposamena ezagutu aurretik, zalaparta handia ibili da hainbat sektoretan eta euskalgintzak murrizketa handiak aurreikusten zituen. Behin proposamena ezagututa, Mikel Irizar, TOKIKOMen presidenteari galdetu diogu gai honen gainean.
Espero zena bete da?
Jaurlaritzak esanda zeukan % 11 jaitsiko zela 2013ko aurrekontua. Eta atal batzutan ez zela murrizketarik izango, zehazki hezkuntzan, osasunean eta gizarte politiketan. Horregatik beste ataletan espero genituen murrizketa handiagoak. Azkenean, HPSren poltsa % 9 jaistea aurreikusten da, batezbestekoaren azpitik. Beraz, ez da bete hipotesirik txarrena, baina murrizketak datoz.

Eta jakina da non?
Alfabetatzean eta hedabideetan orain artekoari eutsi egingo zaio, eta hori esanguratsua da. Hedabideetan zehazki abiatuta gaude hobekuntza prozesu sakon batean eta bidelagun ditugu erakundeak, baita baliabideetan ere. Eta hori bereziki estimatzekoa da, kontuan izanda EITBri % 17ko murrizketa ezarri zaiola. Baina atal batzuen poltsari eusteak esan nahi du beste hainbat ataletan jaitsiera handiagoak izango direla, eta hori txarra da.

Orduan, zein litzateke zure balorazio orokorra?
Nire ustez, euskararen normalizazioa osorik egon behar litzateke jaitsi ezin diren atalen artean, eta hori ez dugu oraindik lortu. Baina irudipena daukat erakunde batzuk mugitzen hasi direla norabide horretan. Nabarmentzekoa da Gipuzkoako Foru Aldundiak euskararen poltsari eutsi izana, eta Jaurlaritzan bertan batezbestekoa baino zerbait hobeto geratzea. Balizko joera hori indartzeko lana egin behar da orain sendo.

Zein norabidetan?
Euskararen normalizazioan ziklo berri baten hasieran gaude. Ikuspegiak berritzen ari dira eta aukerak irekitzen, orain garena baino eraginkorragoak izateko. Jauzi garrantzitsu bat egin daiteke, eragileak suspertzen ari dira. Baina jauzi horrek baliabideak ere behar ditu, eta erakundeen bultzada. Uztartu beharra dago euskalgintza soziala eta instituzionala, ikuspegiak partekatu, estrategiak adostu eta lankidetza hitzartu. Bakoitzak bere aldetik ez du lortuko, elkarrekin leihan are gutxiago.

Hori epe ertaneko lana da, baina epe laburrean ze ondorio espero daiteke?
Krisia hasi zenetik murrizketak metatzen ari dira urtetik urtera. Dagoeneko egitasmo batzuk bidean gelditu dira eta beste batzuk gutxiren faltan daude pott egiteko. Horregatik, aurtengo murrizketen eragina are kaltegarriagoa izango da, lehendik oso ahul dauden ataletan. Oraindik aurrekontuen lehen proposamenean gaude, maiatza bitartean negoziatu egingo dira. Ea euskalgintzan gai garen hobekuntzak eragiteko.

close